Si Jinkee at ang kambal niyang si Janet

Birthday ni Jinkee Pacquiao at ng kanyang kambal na si Janet Jamora noong Huwebes (Enero 12) at pinakita sa television silang magkatabi.

Hindi nga naman masyadong malayo ang mukha. Maayos ang trabaho ni Vicki Belo.

Nag-uusap kami ng aking mga kaibigan tungkol sa report kung paano pinaganda ni Belo si Jinkee at naawa kami kay Janet.

Di ba ibang-iba na ang mukha ni Jinkee. Sexy at glamorosa. Kailangan daw gawin ito ni Jinkee dahil malikot daw ang mata ng boxing champ sa mga sexy na artista na nakakasalamuha sa showbusiness. Di ba showbiz na rin si Pacquiao?

Sabi ni Jinkee dati, ng tanungin siya tungkol sa mga balita sa mga babaeng nauugnay sa asawa niya, “Ayaw kong magalit. Magpaganda na lang ako.”

At sa tulong ni Belo, talaga namang gumanda.

Cover ng January issue ng Mega magazine si Jinkee at halos walang nakakakilala sa kanya dahil ibang-iba ang mukha. Sabi nga ng iba, “Kilala pa rin ba ni Pacquiao ang asawa niya? “ O kilala pa ba siya ng mga anak niya?

Si Jinkee mismo ina-amin niya na ibang-iba na siya ngayon. Ngunit ipinagmamalaki niya ang kanyang pagbabago.

Sabi niya, “Minsan hindi ko na nakikilala ang sarili ko. Parang ‘wow! Totoo ang sinasabi ng ibang tao. Kung ikukumpara mo ako ngayon sa Jinkee dati, lalo pa kung tingnan mo ang aking mga lumang litrato, malaki ang pagkaiba.”

Ang biruan nga ay, kung gusto mo malaman kung ano ang hitsura ni Jinkee dati tingnan mo ang kanyang kambal na si Janet.

Noon yun.

Kasi sabi ni Belo, para hindi naman daw masyadong iba ang mukha ni Jinkee sa kanyang kambal, inayos na rin niya si Janet.

“The twin is also doing some procedures so they don’t end up looking too different,” sabi ni Belo.

Kawawa naman itong si Janet. Biruin mo, wala ka namang sakit, ooperahan ka para retokehin ang mukha mo para lang mahabol ang mukha ng kakambal mo na nag-iba na ang mukha. Major operation ang pagretoke ng mukha ha.

Kung sabagay, hindi natin alam, baka naman gusto rin ni Janet gumanda nang katulad ni Jinkee. Hindi naman problema ang pera sa kanila.

Paano ngayon yan at hindi yata humihinto ang pag-iba ng mukha ni Jinkee. Paano yun, sa susunod na mga buwan, hindi na naman sila magkamukha.

Sabi nga ng isang kaibigan ko, hindi naman pangit ang orihinal na Jinkee. Medyo matapang lang ang pagka-mestisa. Kung gusto niya magpasexy, bakit hindi na niya sabayan ang asawa niya sa pag-exercise sa gym sa halip na magpa-lipo?

Siyempre, magpapawis ka kung mag-exercise ka. Ayaw ng mayayaman mahirapan.

Ay naku. Iba talaga ang problema ng mahihirap kaysa mga lumalangoy sa pera.