Mother Lily, Trillanes at Magdalo

Nakakatuwa si Mother Lily Monteverde sa kanyang “thank you lunch” noong Biyernes para kay Sen. Antonio Trillanes IV at sa Magdalo partylist at ang kanilang dalawang nominees na magiging miyembro na ng Kongreso: dating Marine Capt. Gary Alejano at Air Force Lieutenant Francisco Ashley Acedillo.

Si Trillanes kasi ang isa sa ilang kandidato para senador na inindorso ni Mother Lily. Kasama sa kanyang inindorso ang tatlong topnotchers na si Grace Poe, Loren Legarda, Alan Cayetano at Chiz Escudero.

Sabi ni Mother Lily, “Alam nyo ba kung bakit naka-mini skirt ako?” At talaga naman blooming si Mother na kamakalian lang ay napabalitang lumalaban sa lung cancer.

Sabi ni Mother, crush niya si Trillanes. Biro niya:”Kung ma-reincarnate ako,gusto ko maging asawa si Sen.Trillanes.” Lalo siyang kinilig nang hinalikan siya ng bata at guwapong senador.

Tawa naman ng tawa si Arlene Trillanes, ang magandang asawa ng senador.

Napansin ko nga na halos lahat sa mga tumulong sa kampanya ay pumayat. Sabi ko, dapat siguro taon-taon may eleksyun para hindi na kailangan mag-diet at mag-gym para pumayat.

Noon 2007, nang unang tumakbo si Trillanes para senador, isa sa masugid niyang taga-suporta ay si Jeane Monteverde, ang bilas ni Mother Lily.

Nakakulong pa si Trillanes noon at si Arlene ay nag-aaral sa Australia. Nang magbigay ng party si Mother Lily para i-announce ang kanyang endorsement, ang dumalo noon ay ang nanay ni Trillanes at ang kanyang dalawang anak.

Sa “thank you lunch” na ginanap sa Imperial restaurant sa Quezon City, halos kumpleto ang lahat. Nakakatuwa na nakaka-iyak makita silang malaya at ngayon ay may pagkakataon magsilbi sa bayan pagkatapos ng pitong taon pagkakakulong at pagpapahirap sa kanila nang panahon ni Gloria Arroyo.

Maala-ala natin na nanindigan sila laban sa kurakutan at panloloko ni Arroyo noong Hulyo 2003 sa tinatawag natin ngayon na Oakwood mutiny. Noong Nobyembre 2007, nag-walk out sila sa hearing ng kanilang kaso sa Makati City Hall. Dahil sa palpak ng ibang mga grupo na dapat ay sumuporta sa kanila, napunta sila sa Manila Peninsula. Pinasok ng military ang tangke sa lobby ng hotel para mapwersang sumurender ang mga rebeldeng sundalo.

Sabi ni Alejano sa kanyang pasasalamat, sinasabi ng iba na talo ang Magdalo nang sila ay kinulong. Ngunit sabi niya ngayon, hinalal sila ng taumbayan. “Panalo ang Magdalo.Panalo na rin ang taumbayan,” sabi niya.

Ang nakakatuwa sa mga Magdalo, habang nakakulong sila, hindi nawala ang kanilang pagnanasa na magsilbi sa bayan. Nagpatuloy ang kanilang pag-aaral sa pamamagitan ng internet sa University of the Philippines Open University. Kaya nang lumabas sila, may mga master’s degree sila sa Public Administration.

Sabi nina Trillanes, Alejano at Acedillo, ipagpatuloy nila ang pag-asikaso sa kapakanan ng mga retired na sundalo at kanilang mga pamilya.

“Alam namin ang kanilang mga hinaing. Tatrabahuin naming na mabigyan sila ng sapat na benepisyo para magiging sulit naman ang kanilang sakrispisyo sa bayan,” sabi ni Alejano.